Agora escuendes les manes, Sofía Castañón
Agora escuende les manes.
Eses manes buenes de mio güela
coles que acariciábame'l pelo tó
y llamábame rosa
vida, anxelín rubiu y guapu.
Eses manes.
Eses manes sabies de mio güela
que ficieron caldiu l'iviernu texiendo
mantes meyors que les de cualquier
Penélope, que tornaben la pena en risa
sólo con dexame la caxa botones
pa xugar.
Eses manes.
Güei apuntose a ún cursu d'internet
y nun quier
que naide vea eses manes,
diz que tan vieyes, fees, escures
de tanto trabayar na tierra.
Agora, mio güela, escuende les manes
y nun s'atreve a tocar el teclao l'ordenador.
Y yo, tan lloñe como sigo tando de mi mesma,
nun-y digo que eses manes
ficiéronme creer na vida tantes veces,
nun-y digo que eses son les manes
más guapes que enxamás tocaron
la tierra.
